عايشين: فرح فى الحارة

مرسلة بواسطة عايشين في ٥:٣٦ م

هيصة وزيطة ف قلب الحارة

أصل النهاردة فرح بنت الجارة

أعلام وزينة وألوان

وحاجات حلوة كمان وكمان

جوه البيت الكل بيجرى

باين عليهم اتاخروا ع المجرى

اللى تصب الشربات ف كبابى

واللى تعلى صوتها وتنادى

فين الحنة والبخور ؟

أصل الليلة ليلة سرور

ناس بتنم وناس بتذم

واللى تمصص تمصيص

واللي تقول ده قماش رخيص

وناس بالخير عمرانة قلوبهم

خايفين يزودوا ذنوبهم

بيقولوا بصوا ع الموبيليا

فعلا حاجة جميلة وهايلة

جايبين كوافيرة للعروسة ف البيت

تعمل لها كحكة زوزو وزنبليط

وواحدة بتدى العيال بنبوني

اخدلى واحدة ألا ينسوني

ناس ف المطبخ عمالة تطبخ

وناس تانية عمالة تنفخ

فيه إيه حصل إيه ؟

مش عارفين العريس اتأخر ليه ؟

صوت الزمارة من أول الحارة

جت عربية تعبانة ومشخعلة

كل حتة فيها مخلعة

جواها العريس ع سنجة عشرة

اكنه رايح يقرا النشرة

أبو العروسة اتأخرت ليه يبنى ؟

معلش يا عمى أصلها دايما تتعبنى

عطلت منى ف وسط السكة وخليت عربية كارو تسحبنى

********

عايشين